Beetles for Basel Society
Dr Bloggi käferet jetzt dr ganzi langi Daag, will är alli Käferfründinne und -fründe am 7. Septämber zoobe am halb Säggsi ins Naturhistorischi Museum (das mit em Höhlebär) bringe wott. Gfyrt wird 25 Joor Verein Käfer für Basel (Beetles for Basel Society). Dasch die Society wo n emol grindet woorde n isch um die ryysigi Käfersammlung vom Loodefabrikant Frey z kaufe-n-und nach Basel zschaffe. Wo aber der Bayrischi Staat beadrait hett, dass me die mit fyne Silberneedeli in fascht sybe Duusig (!) Vitrineschublaade befeschtigte Sexbainler us aller Herren Länder zum Deutschen Kulturguet erkläre miess und die Sammlig nümm het derfe ooni Bewilligung ussgfiehrt wäre, do het d Witwe vom Sammler si de bereits zimmlig begaischterte Baslerinne und Basler (oder ebbe däne irer Beetles for Basel Society gschänggt. Dorum sinn si jetzt (ab 97) do unterem Dach vom Berri-Museum und mache nit nur Koleopterolooge nydisch.
Das isch dr Flayer vo vorne
und vo hinte:
und gmacht hett en dr Anthony Barzuelo Bertschi http://www.abdesign.ch
und är isch bereits e Rariteet (dr Flayer).
Die ganz Gschicht von de 25 Joor Käferabenteuer ka me n uff der Wäbsyte vom Verain lääse und no vyl meh
http://www.jubilaeum-kaeferfuerbasel.ch
Aber nit alli Käfer gheere ins Museum.
Hänn d Rootsheere an der (Käfer-)Fasnacht 1988 gfunde:
Luegsch em in d Auge, wiird s dr waarm,
gang nimm dyy Kääferli in Aarm
und winsch dernoo mit guetem Grund
ass ääs nit in s Museum kunnt.